• Նորություններ
• Հղումներ
• Գործընկերները
• Կայքի Քարտեզ

 ԱԲՐԱՀԱՄ Բ ԽՈՇԱԲԵՑԻ, Բաղիշեցի, Մշեցի, Քեղեցի (1677–1734, հանգչում է Վաղարշապատի Ս. Գայանե վանքում), Ամենայն հայոց կաթողիկոս 1730-ից: Հաջորդել է Կարապետ Բ Ուլնեցուն: Աշակերտել է Գրիգոր Շղթայակրին: 1708-ին՝ Մշո Առաքելոց վանքի առաջնորդ, 1717–30-ին՝ Տարոնի Ս. Կարապետ վանքի վանահայր: 1727-ին ուխտագնացություն է կատարել Երուսաղեմ, որի առթիվ խաչքար է տեղադրվել Ս. Հակոբյանց վանքում: Շինարարական  աշխատանքներ է կատարել Էջմիածնի վանքում, պատկերազարդել է տվել Մայր տաճարի երկու խորանները, որմերն ու սյուները, նորոգել մի շարք կառույցներ: Աբրահամ Բ Խոշաբեցու անունով մեզ են հասել 7 ներբող ու հոգևոր տաղեր (անտիպ) և կոնդակներ: Կաթողիկոսական գահին Աբրահամ Բ Խոշաբեցուն հաջորդել է Աբրահամ Գ Կրետացին:

                                                                                                                       Չոբանյան Պ.

Աղբյուրը՝ «Քրիստոնյա Հայաստան» հանրագիտարան, գլխ. խմբ. Հովհ. Այվազյան, Հայկական հանրագիտարան հրատ., Երևան, 2002, էջ 9-10:

Տես նաև՝

Չամչյանց Մ.,Պատմութիւն Հայոց, հ. 3,Վնտ., 1786:

Ակինյան Ն., Բաղեշի դպրոցը 1500–1700, Վնն., 1952:

Անասյան Հ., Հայկական մատենագիտություն, հ. 1, Ե., 1959: